Vilhjálmur Vilhjálmsson

Í dag eru 30 ár síðan þessi snillingur fór hinu megin við línuna og það er búið að vera alveg hreint yndislegt að hlusta á Rás 2 í allann dag þar sem þar er verið að heiðra minningu hans og spila lögin hans, gömul samtöl og viðtöl við vini, aðdáendur og ættingja, ótrúlegt hvað þessi lög snerta mann djúpt og hvað þau eru falleg og vel sungin. Hefði ekkert á móti því að vera að fara á tónleika í kveld að hlusta á Stebba, Friðrik Ómar, Jón Ólafs og marga marga fleiri flytja lögin hans, en svona er þetta nú stundum þegar maður á heima svona út á landinu góða.

Ég fór í dag upp á Hornbrekku og heimsótti gamla konu, hana Jónínu Þorsteins sem er 95ára. Ég fór nefninlega til hennar þegar ég var komin á steypirinn með Karenu Helgu og þá voru amma Eva og Hilla þar líka. Við drukkum saman kaffi og hún var svo hress þessi elska. Ég fékk alveg flashback frá því að ég og Hilmar Ingi lékum okkur þarna daglega, inn í bílskúr, úti í garði og í öllum herbergjum. Hún átti ennþá allt dótið sem við lékum okkur með, spilin voru ennþá eins rifin, vitinn var á sínum stað og hún átti ennþá sömu glösin og við drukkum úr sem krakkar. Alveg var þetta ótrúlegt að sjá þetta allt aftur. Eftir þennan dag þá lofaði ég þeirri gömlu að ég myndi kíkja á hana með barnið þegar það væri fætt. Það gerði ég í dag. Mér varð svo sterklega hugsað til hennar í gærkveldi að ég dreif mig í morgun því hún er orðin svo veik. Þegar við mættum við mæðgur í morgun þá sátu Hilla og Gógó hjá mömmu sinni. Ég tók í höndina á henni og talaði við hana og hún þekkti mig, og þegar ég sagði nafnið á Karenu Helgu þá endurtók hún það. Þetta snart mig svo djúpt að ég fór að gráta en samt svo glöð að hafa farið upp eftir og staðið við mín orð. Ég kvaddi þessa yndislegu konu með kossi á ennið og sagði henni hve vænt mér þætti um hana og fór svo heim. Ég veit ekki hvort hún á langt eftir, en hún hefur alla tíð verið við hestaheilsu og búið heima hjá sér alveg til 95 ára aldurs. Ég ætla að vona að maður geti gortað sig af því í ellinni að geta gert það sem hún gerði. Þú ert yndisleg kona.

Lísa